Гистология кафедрасының «Гистолог» студенттік ғылыми үйірмесі университет тарихымен қатарлас ұзақ жылдар бойы жұмыс жасап келеді. «Гистолог» СҒҮ негізгі мақсаты студенттерді жан-жақты дамыту, ғылымға құштарлығын ояту, төменгі курстардан бастап болашақ мамандықтарына, студенттердің бос уақыттарын тиімді пайдалануға баулу. Үйірменің негізгі жұмыс бағыты медицинаны жасушалық деңгейде түсіну, табиғи және жасанды препараттарды дайындап, олардың тіндік құрылысымен танысу, оны зерттеу, ғылыми мақалаларды, тезистерді сауатты жазып үйрету болып табылады. Қазіргі таңда үйірменің жұмысы белсенді, түрлі бағыттарда жүріп жатыр. Оған дәлел үйірменің жетістіктері мен оның мүшесі болуға қызығушылық білдіретін студенттер сұранысы. Үйірме құрамында университетіміздің барлық мамандықтары бойынша, қазақ, орыс, ағылшын топтарын қосқанда 100-ге жуық студент белсенді жұмыс жасайды. Бүгінде үйірмеге гистология кафедрасының оқытушысы Байтенов Куаныш Кенесович жетекшілік етеді. «Гистолог»СҒҮ жаңа даму жоспары бойынша 5 негізгі бағытта жұмыс жасайды, осы мақсатпен төмендегідей топтар құрылған: «СММ» тобы, «Ғылым» тобы , «Лаборатория» тобы, «Макет-муляж» тобы, «Реставрация» тобы. «СММ» тобы – университет деңгейінде, кафедра ішіндегі үйірме шараларын, лабораториялық жұмыстарды, үйірме мүшелерінің жетістіктерін, құндылықтарын жастар арасында, әріптестеріміз арасында толығырақ тарату, бөлісу үшін әлеуметтік желілерде публикациялаумен, сұхбаттар, түрлі интерактивті шаралар ұйымдастыруымен айналысады. Осы арқылы үйірмеміз әлеуметтік желілерде белсенділіктерімен алға басып келеді. «Ғылым» тобы – студенттерді ғылыми жоба, тезис , баяндама жазуға бағыт бағдар берумен, сапалы, дәлелді ғылыми еңбек дайындауға үйретумен, түрлі деңгейдегі конференцияларға мақалалар, жобалар ұсынумен айналысады. «Лаборатория» тобы – оқу процесіне, ғылыми жұмыстарға гистологиялық микропрепараттарды дайындаумен, бояу әдіс тәсілдерін меңгертумен, оларды өз еріктерімен сипаттауға үйретумен айналысады. «Макет» тобы – тіндерді микро және макроскопиялық деңгейде түсіну және сабақ барысында тиімді пайдалану мақсатында макеттер, муляждар, альбомдар мен заманауи оқу құралдарын дайындауға, көрмелерге қажетті материялдарды әзірлеп, іріктеуге жауап береді. «Реставрация» тобы – сынған, ескірген микропрепараттарды қалпына келтірумен айналысады. Сол арқылы оқу процесіне қажетті препараттардың азаймауына, сондай ақ қаржылық жағынан үнемдеуге мүмкіндік береді.Әр топ өзіндік ерекшеліктерімен өз бағыттары бойынша жұмыс жасайды. Үйірмеге келген әрбір студент жеке мүмкіндіктеріне байланысты таңдаған тобына тіркеліп, бір үйдің баласындай бір бірін толықтырып, даму жолында еңбек етеді. Күннен күнге үйірме жұмысы жетіліп, жаңа идеялар мен мақсаттар жүзеге асып жатыр, оған бірден бір себеп болып отырған Университет басшылығы, Гистология кафедрасы жетекшісінің, профессорлық – оқытушылық құрамының студенттердің ғылыми зерттеу жұмыстарын қолдауы және кафедрамыздағы мақтанышпен айта алатын «Морфологиялық лабораторияның» жұмыс жасауы. Морфологиялық лаборатория – студенттерден бөлек, оқытушылар, магистранттар, докторанттар үшін үздіксіз жұмыс жасайды. Осы уақытқа дейін лабораторияның заманауи құрылғылары, әдістері арқасында көптеген ғылыми жұмыстар жасалып келеді, әрі қарай да жасала бермек.